កំពង់ឆ្នាំង៖ នាយករដ្ឋមន្ត្រីកម្ពុជាសម្ដេចតេជោ ហ៊ុន សែន បានជំរុញទៅដល់ប្រជាពលរដ្ឋឲ្យចូលរួមជាមួយនឹងរដ្ឋាភិបាលប្រយុទ្ធប្រឆាំងទៅនឹងជំងឺកូវីដ-១៩ តាមរយៈការបន្តទទួលវ៉ាក់សាំងយ៉ាងហោចណាស់បានបីដូសឲ្យបានគ្រប់គ្នា។

សម្ដេចតេជោ បានលើកឡើងក្នុងពិធីជួបជាមួយនឹងប្រជាពលរដ្ឋដែលរងគ្រោះដោយទឹកជំនាន់ប្រមាណជាង ៣ពាន់គ្រួសារ ព្រឹកថ្ងៃទី២៦ ខែតុលា ឆ្នាំ២០២២នេះ ដោយបានជំរុញទៅដល់ពលរដ្ឋឲ្យទៅបន្តទៅទទួលវ៉ាក់សាំងកូវីដ-១៩ ដូសទី៣ ឲ្យបានគ្រប់គ្នា និងផ្សព្វផ្សាយព័ត៌មាននេះទៅកាន់អ្នកដទៃទៀតផងដែរ។ 

ជាមួយគ្នានេះសម្ដេចក៏បានអបអរសាទរដែលកម្ពុជាបន្តគ្មានជំងឺកូវីដ-១៩ នៅក្នុងប្រទេសដែលជាថ្ងៃទី៦ ផងដែរ។ 

គួរឱ្យដឹងផងដែរថា យុទ្ធនាការចាក់វ៉ាក់សាំងរបស់រាជរដ្ឋាភិបាលចាប់ផ្ដើមឡើងនៅឆ្នាំ២០២១ ដោយចំណាយពេលប្រមាណ ១០ខែ ដើម្បីចាក់ស្រោចវ៉ាក់សាំងជូនពលរដ្ឋឲ្យបានគ្រប់គ្នា។ ដោយសារភាពជោគជ័យនៃយុទ្ធនាការនេះធ្វើឲ្យកម្ពុជាអាចបើកនៅសង្គមសេដ្ឋកិច្ចឡើងវិញបានដូចសព្វថ្ងៃ៕ 

^{PHOTO: EAC NEWS}